Eg skal kveða um eina þig alla mína daga

Annað upplag er komið og þar með langþráð útgáfa í harðspjaldaformi, sem varð uppseld í sumar. Ástarljóð Páls hafa vakið stormandi lukku því víða var búið að bíða lengi eftir þeim í einni útgáfu. Páll Ólafsson var með sanni ástmögur þjóðarinnar og kunni alþýða manna allnokkur ljóð eftir hann utanbókar.  Eftir Pál liggur eitt mesta safn ástarljóða nokkurs íslensks skálds og núna er þessum arfi í fyrsta sinn safnað í eina bók og birt eru fjöldi kvæða og vísna sem ekki hafa áður sést á prenti. Ástarljóðin eru fyrst og síðast skáldleg tilfinningatjáning en í tímaröð mynda þau jafnframt ástarsögu þeirra Páls og Ragnhildar Björnsdóttur.

Japanskar konur hraustar og grannar

Út er komin bókin Japanskar konur hraustar og grannar hjá bókaforlaginu Sölku. Í bókinni, sem er eftir Naomi Moriyama og William Doyle, fjalla höfundar um af hverju fólkið í Japan lifi lengur en annars staðar í veröldinni og af hverju konurnar þar séu grennri og unglegri. Þau segja það ekki bara japönskum erfðaeiginleikum að þakka heldur líka mataræðinu og telja það sannað að Vesturlandabúar sem tileinka sér japanskt mataræði verði hraustari og grennri.   Í bókinni segir Naomi frá matarmenningu þjóðar sinnar og hvernig þau hjónin aðlöguðu japanskt mataræði vestrænum lifnaðarháttum sínum. Bókin er auk þess sneisafull af girnilegum, meinhollum og einföldum uppskriftum og fróðleiksmolum um japanskt hráefni og matargerð.   Naomi Moriyama ólst upp í Tókýó en flutti til Bandaríkjanna þar sem hún fór í háskólanám og bætti á sig 12 kílóum! Nokkrum árum síðar fór hún með amerískum eiginmanni sínum til Tókýó og dvaldi þar í mánuð. Fyrr en varði hrundu kílóin af þeim báðum án þess að þau gerðu nokkuð til þess. Bókin er í kiljubroti, 273 blaðsíður, og  prentuð í Finnlandi. Eyjólfur Jónsson sá um umbrot og Salka og GBÓ hönnuðu kápuna. 

Þýðandinn, Þóra Sigurðardóttir, er einnig höfundur bókanna; Djöflatertan og Ef þú bara vissir í samstarfi við Mörtu Maríu Jónsdóttur. Hún býr á Bahamas með eiginmanni sínum Völundi Snæ Völundarsyni sem rekur þar tvo veitingastaði.