Amen í dönskum dómi

 Tine Marie Winther, bókmenntagagnrýnandi á dagblaðinu Politiken í Danmörku, líkir Afleggjara Auðar A. Ólafsdóttur við gullaldarmálverk – eða fallega altaristöflu. Í dóminum, sem lesa má í heild sinni hér, ítrekar Winther kristilegar vísanir bókarinnar með því að kalla hana fallega og undarlega systur Da Vinci lykilsins. Þó án krimma-vinkils eða andstyggilegheita:

„Fyrst og fremst er svo notalegt að lesa skáldsögu þar sem ekki er að finna eina einustu vondu manneskju. Persónurnar geta verið séðar og jafnvel notfært sér annað fólk, en verra verður það ekki og það gerist í mesta lagi til þess að fá í gegn einhvern minniháttar greiða.“

Dómurinn er sérlega jákvæður, persónusköpun Auðar þykir trúverðug, handverki og skáldskapargáfu hrósað í hástert. Hún mælir eindregið með þessu fallega, sérstaka og verðuga framlagi Íslendinga til Bókmenntaverðlauna Norðurlandaráðs. AMEN!

Dag(atals)bók

Næstkomandi sunnudag, 22. febrúar, byrjar Góan - á konudag!

Þetta vitum við Sölkur, vegna þess að konudagur er (að sjálfsögðu) merktur inn í okkar góðu dagatalsbók 2009: Konur eiga orðið allan ársins hring. Með hækkandi sól og hlýnandi veðri finnst okkur ekki verra að geta skipulagt tíma okkar, párað niður hugsanir og krassað litlar krúsídúllur í bók sem gefur meira en bara að telja daga ársins.

Það er ekkert skrýtið að dagatalsbækurnar hafa vakið mikla athygli, enda eru þær einstakar. Hugmyndin með bókunum er að skapa vettvang þar sem allar konur geta komið að hugrenningum, spakmælum og pælingum. Allt kemst því miður ekki fyrir á prenti, en allir geta sent okkur myndir eða eina til tvær setningar um lífið og tilveruna, sem við veljum úr. Við erum þegar farnar að safna í bókina fyrir 2010! Og stundum er svo gott bara að skrifa hugsanir sínar fyrir sjálfa sig. Fallega dagatalsbók má lika nota sem dagbók.

Tíminn líður og nú fer hver að verða síðastur að fá sér bleika bók fyrir 2009. Staflarnir lækka í lagerhillunni hjá okkur. Enda er bókin ótrúlega töff og myndræn framsetning er fallega útfærð af Myrru Leifsdóttur. Alls eiga 80 konur orð og list í bókinni og þær eru á aldrinum átta til hundrað ára!

Eins eiga dagatalsbækurnar eigin "grúppu" á facebook og þar viljum við auðvitað heyra frá sem flestum. T.d. er hægt að pósta hugrenningum eða benda okkur á merkar konur til að minnast. Skrifið okkur t.d. eitthvað sniðugt í tilefni konudagsins!

Konur eru konum bestar og konur eiga orðið - allan ársins hring!

Matur og tími

Þegar óreiða samfélagsins virðist ætla um koll að keyra getur verið ágætt að hafa reiður á sínum málum heimafyrir.Yfirsýn og gott skipulag getur verið lykillinn að farsælu fjölskyldulífi og hagkvæmu heimilisbókhaldi. Mjög í anda búsáhaldabyltingar ákvað SALKA að gefa út fallegt eldhúsdagatal til að auðvelda húsmæðrum og –feðrum þessa lands að fylgjast með tímanum.

Dagatalið hannaði Helgi Hilmarsson. Hver mánuður er skemmtilega myndskreyttur matartegund og nöfn hinna ýmsu ávaxta, grænmetis, bauna og kryddjurta skráð við hverja mynd. Dagatalið er þannig í senn fræðandi og fallegt, í gjöf eða heim á eigin vegg. Eldhúsin lifi!

Lesa meira

Bakþankar um dagbók

Dagbók Hélène Berr hefur áhrif á alla sem hana lesa. Hvernig skyldi maður sjálfur bregðast við slíkum áföllum og hörmungum sem gyðingar í Evrópu stóðu frammi fyrir í seinni heimstyrjöld? Og hvernig stendur á því að sambærilegar hörmungar geta sífellt verið að endurtaka sig? Nú síðast velti Gerður Kristný fyrir sér „stjörnuprýddri“ sögu þessarar ungu Sorbonne-stúlku í bakþönkum í Fréttablaði gærdagsins. Þar skrifar hún m.a.:

„Það gerist allt of sjaldan að bók heilli mann svo mikið a ð hún víkur ekki úr huganum löngu eftir að lestrinum er lokið. Nú fyrir jólin kom ein slík bók út, Dagbók Hélène Berr í þýðingu Ólafar Pétursdóttur. ... Þótt verið sé að lýsa grimmd, sorg, nötrandi hræðslu og niðurlægingunni yfir að þurfa að bera gulu gyðingastjörnuna skín ást  Hélène til ungra skjólstæðinga sinna alltaf í gegn og fegurð heimaborgar hennar, Parísar. Fyrst og fremst lýsir dagbókin samt ótrúlegum kjarki ungrar konu sem afhenti vinnukonunni skrifin sín með reglulegu millibili ef vera skyldi að hún yrði sjálf handtekin næst. Hélène Berr fannst mikilvægara að koma vitnisburði sínum undan en sjálfri sér, vitnisburði sem fær fólk nú 50 árum síðar til að falla í stafi.“

Lesið allan pistil Gerðar Kristnýjar hér.

Nokkur slökunarráð

Í bókinni 1001 leið til að slaka á eru eins og nafnið gefur til kynna 1001 ráð til að hjálpa okkur að slaka á.  Í bókinni er lögð áhersla á að slökunin sé nærtæk og sem dæmi má nefna eru gefin ráð um slökun á vinnustað, heima, í náttúrunni og við huglægar aðstæður einnig.

Slökun á vinnustað:

Ráð #20 Gakktu í vinnuna:

Sannað þykir að áhrifamikill streituvaldur í ferð til og frá vinnu er að finnast maður algjörlega upp á umferð og/eða áætlanakerfi strætisvagna kominn. Til að takast á við þetta vandamál er árangursríkast að treysta á sína tvo jafnfljótu og ganga til vinnu ef þú mögulega getur. Notaðu tímann á göngunni til að undirbúa þig andlega undir vinnudaginn, síðan geturðu andað léttar á leiðinni heim.

Ráð #40 Teygðu á hryggnum:

Frábær æfing sem opnar fyrir orkurásir líkamans. Settu hægri fót upp á stól og leggðu vinstri hönd á hné. Snúðu hægri öxlinni aftur og láttu hrygginn fylgja eftir. Andaðu frá þér og snúðu öxlinni aðeins lengra aftur. Andaðu að þér og snúðu fram. Gerðu það sama hinum megin.

Ráð #170 Fáðu þér blund:

Stuttur miðdegisblundur getur gert kraftaverk. Samkvæmt niðurstöðum rannsóknar sem gerð var á vinnuafköstum nokkurra starfsmanna kom fram að þeir sem lögðu sig í hálfa klukkustund í hádeginu þrisvar í viku, sýndu mestu afköstin. Auk þess voru þeir í mun minni áhættu að fá hjartasjúkdóma.

Það er til 1001 leið til að slaka á

 

Bókin 1001 leið til að slaka á er komin út hjá Sölku. Bókin er byggð upp á 1001 örstuttum, hvetjandi og uppbyggilegum köflum þar sem fjallað er meðal annars um er hvernig best sé að höndla streitu á vinnustað, heima fyrir, á meðgöngu og eftir fæðingu, í samskiptum við ástvini og á jólunum. Langvarandi streita getur orsakað ýmiss konar sjúkdóma og lögð er áhersla á lausnir þar sem ekki þarf að eyða miklum fjármunum í lyf eða meðferðir.

María Magdalena hugsanlega gefin út í Svíþjóð!

Þórhallur Heimisson prestur og höfundur bókarinnar María Magdalena; vegastjarna eða vændiskona, er staddur í Svíþjóð - nánar tiltekið Uppsölum til að halda fyrirlestur um Maríu Magdalenu og segja frá efni og tilurð bókarinnar. Efnið er mjög vinsælt í Svíþjóð og má sem dæmi nefna að nú stendur yfir sýning á Historiska museet í Stokkhólmi sem heitir "Maria - drömmen om kvinnan" eða María- draumurinn um konuna, þar sem meðal annars er komið inn á sögu Maríu Magdalenu.

Þórhallur hefur verið í sambandi við Verbum útgáfuna varðandi útgáfu bókarinnar í Svíþjóð og eru þau mjög áhugasöm um sænska útgáfu af bókinni um hana Maríu Magdalenu.

 

Gurrí á Vikunni fílar Randy Pausch

 

Hin vinsæli DV - bloggari og aðstoðarritstjóri Vikunnar skrifar fallega um bókina Síðasti fyrirlesturinn á blogginu sínu.

Kláraði Síðasta fyrirlesturinn í nótt. Dauðvona maður á besta aldri, kvæntur og faðir þriggja ungra barna, skrifar um hvernig við eigum að láta drauma okkar rætast og hvernig honum tókst það sjálfum. Mér fannst t.d. áhugavert að lesa um fyrrverandi kærustuna hans sem skuldaði nokkur þúsund dollara og var að farast úr áhyggjum. Hún fór í jóga öll fimmtudagskvöld til að reyna að róa hugann. Maðurinn benti henni á að ef hún fengi sér frekar vinnu á fimmtudagskvöldum gæti hún greitt upp skuldina á ekki svo löngum tíma. Akkúrat það sem ég hugsaði ... konan gerði þetta, vann á veitingastað eitt kvöld í viku, greiddi upp skuldina og hélt síðan áfram í jógaleikfimi, alsæl og áhyggjulaus. Auðvitað á að vaða í málin, uppræta rót vandans! Jamm.

Græn hreinsiefni

 

Í bókinni Uppeldi fyrir umhverfið er urmull ráða fyrir foreldra sem vilja ekki bara spara í heimilishaldinu heldur líka vera umhverfisvæn. Þar kemur meðal annars fram að vistvænustu hreingerningavörurnar séu til nú þegar heima hjá flestum - í eldhúshillunum;

 

 

dæmi um græn hreinsiefni:

• Borðedik - þynnið það með vatni til að þrífa borð, gler og flísar eða notið óblandað til að losa stíflur í sturtu og vaski. Ediklyktin hverfur um leið og það gufar upp.
• Sítrónusafi - látið sítrónusafa drjúpa á borðplötur og skurðarbretti til að bleikja og losna við fitu.
• Salt - notið það til að vaska upp og til að þvo steikarpönnur
• Krydd- látið malla handfylli af kryddi (t.d. kanilstangir, negul, ferska engiferrót, kardimommufræ, stjörnuanís), eða sítrónu - , súraldin - og appelsínusneiðar til að fá ilm á heimilið.
• Matarsódi - Blandið með vatni og þrífið vaska og baðker. Stráið í klósettskálina, bætið við borðediki og skúbbið.
• Örtrefjaklútar - Bleytið þá lítillega og nuddið með þeim. Ekki þarf leysiefni eða hreinsiefni í örtrefjaklúta til að losna við fitu eða erfiða bletti.

 

Skáldið Inger Christensen látin

eftirfarandi frétt birtist í Morgunblaðinu í gær:

Inger Christensen

DANSKA skáldkonan Inger Christensen, sem lést sl. föstudag 73 ára að aldri, var margorðuð við nóbelsverðlaun án þess þó að hljóta þau. Hún var eitt þekktasta skáld sinnar kynslóðar í Danmörku, þekkt fyrir formtilraunir sínar og frumleika.

Christensen, sem fæddist í bænum Vejle árið 1935, fékk fyrsta ljóðasafn sitt, Lys [Ljós], gefið út árið 1969. Ári síðar kom út bókin Græs [Gras]. Það var þó ekki fyrr en með ljóðasafninu Det [Það], sem hún vakti verulega athygli, og var verkið álitið skipta sköpum í ferli hennar.

 

Illskilgreinanleg skáldverk

Eftir að þessar bækur komu út sneri Christensen sér að greinaskrifum, skáldsögum og barnabókum í rúman áratug áður en hún sendi frá sér ljóðabók. Það var árið 1981 að bókin Alfabet [Stafrófið] kom út og síðan Sommerfugledalen [Fiðrildadalurinn] árið 1991, sem gagnrýnendur telja hennar helsta meistaraverk.

Sagt hefur verið um skáldskap Christensen að erfitt sé að skilgreina hann. Erik Nielsen, prófessor í bókmenntum við Kaupmannahafnarháskóla, lýsti þó verkum hennar á þann veg að henni hefði tekist að „nota ópersónulegt kerfi til að skapa einkar persónulegan skáldskap“.

Christensen var sæmd mörgum merkilegum bókmenntaverðlaunum á lífsleiðinni þótt henni féllu ekki nóbelsverðlaun í skaut og naut mikillar virðingar meðal kollega sinna.

 Salka gaf út ljóðabókina hennar Ljóð um dauðann  sem Valdimar Tómasson þýddi og fæst hún hjá okkur í forlaginu á aðeins 490 kr.