Konur geta breytt heiminum

Rétt eins og Halla og Kristín trúum við Sölkur á mátt og gildi kvenna þegar kemur enduruppbyggingu og framtíðarsýn samfélagsins. Einn af liðunum í að gera fjármálaheiminn heilbrigðari er að gera hann grænni. Og við byggjum framtíðina á vali dagsins í dag. Við viljum sjá konur sameinast um að taka græn skref í öllum geirum!

Í nýrri bók Guðrúnar G. Bergmann, Konur geta breytt heiminum með nýjum lífsstíl, skrifar hún m.a.:

"Þrátt fyrir aukið jafnræði kynjanna á flestum sviðum, eru það í mörgum tilvikum konur sem ráða innkaupum heimilisins, svo og innkaupum fyrirtækja og stofnanna. ... Konur hafa því, í gegnum ótal innkaupaferla, meira vald en þær eru yfirleitt meðvitaðar um og geta valið hvernig þær stýra því. Þar liggur bæði tækifæri þeirra og vald til að breyta heiminum."

Við trúum líka á mátt kvenna til að sameinast um verkefni tengd umhverfisvænni framtíð. T.d. er bók Guðrúnar prentuð hjá hinni umhverfisvottuðu prentsmiðju Hjá GuðjónÓ. Bókinni er pakkað í pakkað í maíssterkjufilmu í stað plasts og mun Salka framvegis hætta notkun plastefna í bókapökkun. Maíssterkja brotnar niður í náttúrunni og eyðist á 10 – 45 dögum. Í tengslum við útgáfuna hafði Guðrún samband við þáverandi umhverfisráðherra Kolbrúnu Haraldsdóttur og þegar er hafin vinna að því að koma plastpokum úr maíssterkju á markað í samvinnu við ráðuneytið og Plastprent. Gott dæmi um grænt skref í rétta átt!

Við hlökkum til að vinna með sem flestum konum - vonandi m.a. þessum glæsilegu Auðar-konum - að grænum skrefum í átt að betri framtíð! Konur geta bjargað heiminum!!!

Lesið meira á: www.graennlifsstill.is

 

Kvenleg gildi til bjargar

Lóa Maja aftur á spítala

Til allrar hamingju er það ekki hlutskipti margra lítilla barna að dvelja langdvölum á sjúkrahúsi, fjarri fjölskyldu og vinum. Það fékk þó Lovísa María Sigurgeirsdóttir frá Hrísey að reyna og í bókinni Ég skal vera dugleg rifjar hún upp dvöl sína á Fjórðungssjúkrahúsinu á Akureyri þegar hún var lítil stelpa upp úr 1960.

Í síðustu viku fór Lóa Maja í heimsókn á Barnaspítala Hringsins og las uppúr bókinni sinni fyrir börn og starfsfólk, hér segir hún frá heimsókninni:

Ég er búin að vera með öll börnin mín fjögur á sjúkrahúsinu á Akureyri sem sagt barnadeildinni þar og svo með annan son minn á Landspítalanum  áður en nýja barnadeildin var tekin í notkun.  Að koma þangað minnti mig meira á þann tíma en tímann þegar ég sjálf var á sjúkrahúsinu sem lítil stelpa.  Þetta er svo óskaplega ólíkt.   Þarna voru litlu sjúklingarnir ýmist í rúmunum sínum eða á fótum og hjá þeim öllum var foreldri eða í það minnsta einhver fullorðinn sem ég reikna með að hafi verið foreldri.  Ég las úr bókinni minni inni á leikstofu þar sem heilmikið var af leikföngum.  Þarna voru leikjatölvur og sjónvarp. Lítil borð og stólar voru þarna líka fyrir smáfólkið. Hillur fullar af föndurdóti og bókum. Sem sagt ýmislegt til þess að hafa ofan af þeim litlu börnum sem þurfa að vera þarna í lengri eða styttri tíma.

Þegar ég var á sjúkrahúsinu var ekkert þess háttar til staðar fyrir okkur.  Ekki einu sinni foreldrarnir.  Þeim var haldið fjarri eins mikið og hægt var því þeir þóttu koma of miklu róti á okkur litlu sjúklingana.  Við grétum svo mikið þegar þeir fóru.  Leikföngin voru fá og aðeins örfáar bækur fyrir okkur hin sem voru búin að læra að lesa.  Við vorum þó með nokkur leikföng sem við áttum sjálf en það var ekki svo mikið.  En þrátt fyrir að þetta hafi breyst svona mikið þá fylltist ég samt þessari tilfinningu sem ég fæ alltaf þegar ég kem inn á sjúkrahús.  Minningarnar hellast yfir mig og ég verð bæði sorgmædd og þakklát.  Sorgmædd vegna allra þeirra barna sem ekki voru jafn heppin og ég og þakklát fyrir að hafa fengið að kynnast þessum litlu hetjum sem tókust á við erfiðleika og veikindi af miklu æðruleysi og dugnaði. Þau hafa kennt mér meira í lífinu en nokkuð eða nokkrir aðrir.

En þó svo að börnin sem í dag þurfa að leggjast á sjúkrahús hafi pabba og mömmu hjá sér allan sólarhringinn þá eru þau samt sem áður tekin út úr daglegu lífi og þurfa að takast á við hluti sem ekkert barn ætti að þurfa að upplifa.  Mér sýndist starfsfólkið á Barnaspítalanum vera sama elskulega fólkið og annaðist um mig þegar ég var lítil og fátt breyst í þeim efnum nema klæðnaðurinn sem er ekki eins formfastur og áður.  Í það minnsta eru kapparnir horfnir af höfðum hjúkrunarkvennanna.  

Ég þakka öllum þeim sem hlustuðu á mig kærlega fyrir góðar móttökur og óska börnunum góðs bata og bjartrar framtíðar.

Kærar kveðjur
Lóa Maja. 

 

Breytum heiminum!

SALKA er alltaf að verða grænni og á degi jarðar, þann 22. apríl, gáfum við út bókina Konur geta breytt heiminum með nýjum lífsstíl eftir Guðrúnu G. Bergmann. Guðrún er frumkvöðull í umhverfisvænni ferðaþjónustu á Íslandi en auk þess að hafa skrifað mikið um umhverfismál liggja eftir hana fjölmargar bækur um sjálfsrækt og heilsutengt efni. Hér fjallar Guðrún um þau gífurlegu áhrif sem konur geta haft á umhverfið og samfélagið, með því að beina innkaupum sínum og lífsmáta inn á grænni brautir. Samstöðu kvenna og góð gildi fær fátt stöðvað!

Í tengslum við útgáfu bókarinnar opnar Guðrún heimasíðuna www.graennlifsstill.is, þar sem hún safnar ýmsum fróðleiksmolum og ráðum um hollustu og umhverfisvernd; Við SÖLKUR mælum með honum!

Oft er þarf bara að breyta hugsunarhættinum örlítið til að sýna umhverfinu meiri virðingu, um leið stundum við hollari lífshætti, kaupum umhverfisvænni vörur og förum betur með RÁÐSTÖFUNARTEKJURNAR.

Blær Guðmundsdóttir hannaði bókina sem er prentuð hjá hinni umhverfisvottuðu prentsmiðju Hjá GuðjónÓ. Bókinni er pakkað í pakkað í maíssterkjufilmu sem framleidd er hjá Plastprent sérstaklega til þessara nota. Mun Salka framvegis hætta notkun plastefna í bókapökkun. Maíssterkja brotnar niður í náttúrunni og eyðist á 10 – 45 dögum.

Umherfisráðherra, Kolbún Hallórsdóttir, tók við eintaki af bókinni við hátíðlega athöfn hjá Sölku á degi jarðar og gaf fyrirheit um stuðning Umhverfisráðuneytisins. Höfundurinn afhenti síðan forseta Íslands, Ólafi Ragnari Grímssyni, eintak á Bessastöðum.

Leitum ekki langt yfir skammt

Það er kreppa og ekki efni á endalausum flugmiðum og ferðalögum, en hinsvegar meiri ástæða en oft áður til þess að fjölskyldur njóti samverustunda og skapi sér skemmtilega daga og ánægjulegar minningar. Það er alger óþarfi að leita langt yfir skammt eftir gæðastundunum. Reykjavík býður upp á ótal möguleika á skemmtun og dægradvöl fyrir börn og barnafjölskyldur!

Stöllur Lóa Auðunsdóttir og Þórey Vilhjálmsdóttir settu sér fyrir að safna öllu sem höfuðborgin okkar hefur uppá að bjóða undir einn hatt. Þær unnu hörðum höndum og í náinni samvinnu við Borgarráð, ÍTR og hina og þessa þjónustuaðila. Útkoman er einstaklega glæsileg, litrík og skemmtilega hönnuð bók stútfull af frábærum hugmyndum að skemmtilegum fjölskyldudögum í Reykjavík. Hún er í handhægu broti sem hentar einkar vel í tösku, kerrupoka eða hanskahólf í bíl, á gormi og með mislitum flettispjöldum til aðgreiningar á köflum.

Reykjavík barnanna er bæði á íslensku og ensku og ætluð jafnt innfæddum og aðfluttum, ferðamönnum og reykvískum fjölskyldum. Ómissandi fyrir pabba og mömmur, afa og ömmur, nýfluttar fjölskyldur, fjölskyldur sem heimsækja borgina og alla aðra sem vilja gleðjast með börnum í höfuðborginni.

Reykjavík er barnaborg! Og Salka leiðir ykkur á vit ævintýranna sem hún hefur uppá að bjóða!

Áfram Afleggjarinn!

Bókin Afleggjarinn eftir Auði A. Ólafsdóttur heldur áfram að gera það gott. Auk Menningarverðlauna DV 2008, Fjöruverðlaunanna 2008 og tilnefningar til Bókmenntaverðlauna Norðurlandaráðs 2009, vekur bókin áhuga og aðdáun útgefenda hvar sem hún kemur.

Bókin er komin út á dönsku og hefur fengið lof gagnrýnenda þar. Í síðustu viku fjallaði Jórunn Sigurðardóttir um bókina í þættinum Seiðir og hélög á Rás 1 og ræddi þá m.a. við þýðanda bókarinnar á dönsku, Erik Skyum Nielsen. Þáttinn má hlusta á hér.

Nú hefur verið gengið frá samningum stórforlagið Suhrkamp Insel um útgáfu Afleggjarans á þýsku. Auk þess er SALKA í viðræðum við forlög víðar, m.a. á hinum norðurlöndunum og í Frakklandi, um þýðingar. Við erum stoltar af velgengni Auðar og hlökkum til að glugga í sem flestum útgáfum af þessari óvenjulegu og einstaklega vel skrifuðu bók.

Sölkukvöld með Maxine

 

 

Reikimeistarinn og metsöluhöfundurinn Maxine Gaudio kynnir lífsspeki sína og metsölubókina Ferðalagið að kjarna sjálfsins hjá okkur í Sölku, Skipholti 50c, fimmtudaginn 26. mars kl. 20.

 

Sigríður Klingenberg verður sérstakur gestur og mun hún lesa upp úr bók Maxine.

 

Ragnheiður Guðfinna Guðnadóttir segir frá upplifun sinni af bókinni.

 

Gefandi og góð kvöldstund.  Aðgangur ókeypis og allir velkomnir.

 

Hlökkum til að sjá ykkur!

Kæra kona!

Vilt þú eiga orðið í hinni vinsælu dagatalsbók SÖLKU:KONUR EIGA ORÐIÐ ALLAN ÁRSINS HRING fyrir árið 2010?
 
Þér er í sjálfsvald sett um hvað þú skrifar; svo lengi sem það er frá eigin brjósti:ÞÚ ÁTT ORÐIÐ. Við erum ekki að leita að löngum eða lærðum hugleiðingum heldur stemmningu, einlægni og hispursleysi.

HUGLEIÐINGUM ÞARF AÐ SKILA FYRIR 15.APRÍL Á EFTIRFARANDI NETFANG: [e-mail] eða [e-mail]

Ef þú vilt sjá hugleiðingar úr fyrri bókum geturðu kíkt á heimasíðu SÖLKU.

Eins og áður myndskreytir listakonan frækna Myrra Leifsdóttir bókina og velur ljósmyndir.
 
Okkur þætti vænt um ef þú áframsendir þetta bréf á allar konur sem þú þekkir því við leitum að konum á öllum aldri, með mismunandi reynslu og lífsstíl. Í dagatalsbókinni 2009 er sú elsta 100 ára verkakona og sú yngsta 8 ára skólastelpa!

 

KONUR UM ALLT LAND Á ÖLLUM ALDRI! TJÁIÐ YKKUR – BÚUM TIL BÓK SAMAN!

FRAMKVÆMD VERKEFNIS

1. Við förum yfir allar innsendar hugleiðingar og veljum þær sem okkur finnst henta best í bókina.
2. Eftir að hafa valið 64 hugleiðingar (í byrjun hverrar viku og hvers mánaðar) látum við viðkomandi vita hvort hann hafi orðið fyrir valinu.
3. Sem þakklætisvott fá höfundar þeirra hugleiðinga sem eru valdar, eina dagatalsbók að gjöf.

Bestu kveðjur,
Kría

[e-mail] og [e-mail]

 

 

 

P.s. Við erum líka á Facebook ;)

Fyrirtaks fermingargjöf

Förðunarbók Þuríðar Stefánsdóttur naut gífurlegra vinsælda fyrir jól og ekkert lát virðist á. Á því er mjög einföld skýring; Bókin er ekki bara falleg og fræðandi, hún er líka þörf. Í henni er sýnt með einföldum hætti hvernig ólík förðun hentar ólíkum tækifærum og hvaða einföldu aðferðum megi beita til að líta sem best út, einmitt án þess að vera stífmáluð í framan.

Þura tekur afgerandi afstöðu gegn of miklu sminki – sérstaklega á ungum stelpum. Einn kafli bókarinnar fjallar um förðun unglinga og þar segir hún m.a.: „Mér hefur alltaf fundist að ungar stelpur ættu að nota frekar minna en meira af förðunarvörum og njóta æskunnar, í stað þess að vera að flýta sér að fullorðnast.“ Í kaflanum kennir Þura einföld grunnatriði um hreinsun og umhirðu húðar, fyrstu förðunarvörurnar, trix fyrir stelpur með spangir og fyrst og fremst að fegurðin kemur innan frá! Þessi, eins og aðrir kaflar bókarinnar, er yfirlætislaus og aðgengilegur – og góð gjöf sem fellur vel í kramið hjá bæði fermingarstúlkum og foreldrum þeirra.

Gerður Kristný dæmdi bókina í Mannamáli 15. desember sl. og sá einmitt þessa kosti bókarinnar. Hún segir m.a.:„Ég sé fyrir mér að þessi bók eigi eftir að eiga langan líftíma. Þetta er fyrirtaks fermingargjöf í vor og hún er ekkert að skafa utan af því hún Þuríður, hún bara vill að ungar konur, sem og þær eldri, séu ekkert að farða sig of mikið.“

Salka fer í bíó

„Hófsemi og einfaldleiki. Það eru nýju kjörorðin mín. Ég ætla að hefja nýtt líf með allt á hreinu og ég ætla ekki að eyða einu einasta pundi. Ekki einu einasta. Ég meina, þegar þú pælir í því, hve miklum peningum eyðum við á hverjum degi? Ekki skrítið að ég sé komin í smá mínus. Og það er nú eiginlega ekki mér að kenna. Ég hef einfaldlega beðið lægri hlut fyrir vestrænni efnishyggju – og ef þú spyrð mig þá þarf maður sko að hafa viljastyrk á við fíl til að standast hana...“

Búðaráp og kaupæði eru ekki helstu kostir þeirra kvenna sem stunda slíkt. Síst af öllu núna, þegar fjárhagsleg óráðsía er auðvitað bara agalega mikið 2007. En góð afþreying er sem betur fer ekki óskynsamleg á þessum síðustu og verstu tímum. Og því þá ekki að fá útrás fyrir velfalinn innri eyðslupúkann með því að sökkva sér í hugarheim kaupalkans Rebeccu Bloomwood í smá stund.

Um þessar mundir sýna Sambíóin kvikmyndina Confessions of a Shopaholic, sem byggð er á samnefndri, geysivinsælli metsölubók Sophie Kinsella. SALKA gaf bókina út fyrst 2005, í þýðingu Ragnheiðar Bjarnadóttur. Draumaveröld kaupalkans er fyndin og yndisleg lesning, það er erfitt ekki að heillast af hinni siðlausu og kaupóðu aðalpersónu – sem Isla Fisher hefur fengið mikið lof fyrir á hvíta tjaldinu. Já, maður kann meira að segja að kannast pínulítið við sig í henni. Og SALKA ætlar að skella sér í bíó á meðan hún bíður eftir næstu bók um kaupalkann, sem kemur út á íslensku snemma í sumar!

Bókamarkaður í Perlunni 2009

Laugardaginn 28. febrúar opnar árlegur bókamarkaður Félags íslenskra bókaútgefenda í Perlunni. SALKA verður að sjálfsögðu á staðnum og í ár höfum við um 170 titla til sölu á frábæru verði.

Nýbreytni ársins er að við sendum m.a. þó nokkrar alveg nýjar bækur upp í Perlu, má þar t.d. nefna Dagbók Hélène Berr, sem fengið hefur gríðargóða dóma – núna síðast í Bakþönkum Gerðar Kristnýjar. Eins verður hægt að finna fjölbreytt úrval sívinsælla SÖLKU-bóka, á borð við 101 hollráð eftir Victoriu Moran, Kaupmannahafnarbækur Guðlaugs Arasonar og Ætigarðinn eftir Hildi Hákonardóttur.

Klassíkerar eins og Mary Poppins, Lilja (sem allir vildu kveðið hafa) og baráttusögurnar um Þóru verða á sínum stað, fjölbreytt úrval ljóðabóka, barnabóka, handbóka, matreiðslubóka o.s.frv. o.s.frv. SALKA lætur ekki sitt eftir liggja ;)   

Bókamarkaðurinn í Perlunni verður haldinn daga 28. febrúar - 15. mars 2009 og er opinn frá 10-18 alla dagana.