Manstu eftir mér?

Kolbrún Bergþórsdóttir skrifaði skemmtilega grein um bókina Remember me , sem kemur út hjá Sölku eftir áramót, í Morgunblaðið í dag. Bókin er eftir sama höfund  bækurnar um kaupalkann óforbetranlega; Sophie Kinsella. Hún heitir í rauninni Madaleine Wickham og hún vann sem fjármálablaðakona (hmm – hljómar kunnuglega) áður en hún sneri sér að ritstörfum. Madaleine hefur gefið út átta bækur undir nafninu Sophie Kinsella og fimm af þeim eru um Becky Bloomwood. Hún hefur jafnframt gefið út sjö bækur undir sínu raunverulega nafni. Fyrsta bók hennar kom út árið 1995 og hefur hún þ.a.l. skrifað 15 bækur á 13 árum – rúmlega ein á ári.

Hérna er það sem Kolbrún hefur um bókina Remember me að segja

 

SOPHIE Kinsella hefur sérhæft sig í samningu gaman- og ástarsagna sem njóta vinsælda víða um heim, einnig hér á landi. Bækur hennar hafa yfirleitt fen...

 

SOPHIE Kinsella hefur sérhæft sig í samningu gaman- og ástarsagna sem njóta vinsælda víða um heim, einnig hér á landi. Bækur hennar hafa yfirleitt fengið ágæta dóma þeirra gagnrýnenda sem átta sig á gildi skemmtibókmennta. Þekktust er Kinsella fyrir bókaflokk sinn um kaupalkann óborganlega Rebeccu Bloomwood. Hér er Rebecca víðs fjarri og Kinsella á nýjum slóðum í bók sem hefur setið ofarlega á metsölulista Eymundsson undanfarnar vikur.

 

Í Remember Me? vaknar Lexi til meðvitundar á sjúkrahúsi eftir bílslys. Hún telur sig vera tuttugu og fimm ára og ógifta og blanka en henni er sagt að hún sé tuttugu og átta ára gömul og gift myndarlegum milljarðamæringi. Einmitt draumalífið sem hana hafði alltaf dreymt um. En hið fullkomna líf reynist ekki svo fullkomið. Lexi þarf að takast á við líf sem hún var búin að gleyma og kynnast hinum forríka en gallaða eiginmanni sínum. Hún lendir í sérstæðum aðstæðum þar sem vinir hennar í fyrra lífi snúast gegn henni og hafa sannarlega ástæðu til. Eins og við er að búast kynnist hún karlmanni sem vekur forvitni hennar og ástin virðist á næsta leiti.

 

Frásögnin einkennist af léttleika og áreynsluleysi sem eru helstu kostir Kinsellu sem höfundar. Hún kemur ekki á óvart en heldur sig á öruggum slóðum notalegrar gamansemi. Bókin er því ágætis skemmtilestur fyrir þá sem leita í góða afþreyingu og vilja ástir, kímni og hæfilega blöndu af misskilningi og spennu.

 

Þetta er bók sem vekur ljúfar tilfinningar og kemur lesandanum í gott skap. Og svo sannarlega veitir ekki af slíkri upplyftingu nú um stundir.