Japanskar konur hraustar og grannar

Út er komin bókin Japanskar konur hraustar og grannar hjá bókaforlaginu Sölku. Í bókinni, sem er eftir Naomi Moriyama og William Doyle, fjalla höfundar um af hverju fólkið í Japan lifi lengur en annars staðar í veröldinni og af hverju konurnar þar séu grennri og unglegri. Þau segja það ekki bara japönskum erfðaeiginleikum að þakka heldur líka mataræðinu og telja það sannað að Vesturlandabúar sem tileinka sér japanskt mataræði verði hraustari og grennri.   Í bókinni segir Naomi frá matarmenningu þjóðar sinnar og hvernig þau hjónin aðlöguðu japanskt mataræði vestrænum lifnaðarháttum sínum. Bókin er auk þess sneisafull af girnilegum, meinhollum og einföldum uppskriftum og fróðleiksmolum um japanskt hráefni og matargerð.   Naomi Moriyama ólst upp í Tókýó en flutti til Bandaríkjanna þar sem hún fór í háskólanám og bætti á sig 12 kílóum! Nokkrum árum síðar fór hún með amerískum eiginmanni sínum til Tókýó og dvaldi þar í mánuð. Fyrr en varði hrundu kílóin af þeim báðum án þess að þau gerðu nokkuð til þess. Bókin er í kiljubroti, 273 blaðsíður, og  prentuð í Finnlandi. Eyjólfur Jónsson sá um umbrot og Salka og GBÓ hönnuðu kápuna. 

Þýðandinn, Þóra Sigurðardóttir, er einnig höfundur bókanna; Djöflatertan og Ef þú bara vissir í samstarfi við Mörtu Maríu Jónsdóttur. Hún býr á Bahamas með eiginmanni sínum Völundi Snæ Völundarsyni sem rekur þar tvo veitingastaði. 

Rósaleppar eru verðugt viðfangsefni

 

Þekkta prjóna-netblaðið: Knitter´s review gaf Rósaleppa-prjónabókinni hennar Héléne Magnússon góða dóma. Í greininni segir Lela Nargi frá rósaleppa-prjóni og hvernig konur prjónuðu mynstur inní roðskinnsskónna sína og vönduðu sig mjög þó svo fáir sem engir myndu nokkurn tímann sjá það - því jú, það var hulið undir iljum fólksins. Hún minnist einnig á að þess konar prjón hafi í raun ekki haft neinn tilgang í nútímanum og var að leggjast í gleymsku, þangað til Héléne enduruppgötvaði og endurnýjaði mynstrið. Hún hefur hannað ótal flíkur, frá peysum að vettlingum og þannig dustað rykið af þessum ótrúlega fallegu mynstrum.

Lela segir uppskriftirnar vera flóknar, fallegar og hugrakkar og séu ögrandi verkefni fyrir prjónara sem sé tilbúin til að prufa eitthvað nýtt og töfrandi.  

Hægt er að kaupa nýja uppskrift eftir Hélene eingöngu á http://www.lelanarginews.blogspot.com/

Valhopp

Barnabókin Gallop, sem er búin að slá svo aldeilis í gegn (er að klára sína 34 viku á metsölulista N.Y. Times), kemur út hjá Sölku í haust. Höfundur bókarinnar, Rufus Butler Seder, fann upp sérstaka tækni sem hann kallar scanimation og minnir á töfrasjónauka sem margir léku með í æsku, og han notaði við gerð bókarinnar. Allar bækurnar eru handgerðar og fór Rufus sérstaklega til Kína til að kenna handverksmönnunum að búa til bækurnar. 

Höfundurinn er uppfinningamaður, listamaður, og kvikmyndagerðamaður sem hefur djúpstæðan áhuga á antik- sjónbrenglunar-leikföngum. Hann fann einnig upp Lifetiles/lífflísar, veggmyndir gerðar úr glerflísum sem virðast lifna við þegar áhorfandi gengur fram hjá þeim; þær eru til sýnis á Smithsonian safninu í Bandaríkjunum

Hver einasta blaðsíða í Valhoppi er undur útaf fyrir sig og þar koma m.a. til sögunnar valhoppandi hestur og skjaldbaka sem syndir upp blaðsíðuna, hundur sem hleypur, köttur sem stekkur og fiðrlildi blakar vængjum.

 

Eigum við orð?

Vegna þess hve dagatalsbókin Konur eiga orðið 2008 fékk frábærar viðtökur hefur bókaútgáfan Salka ákveðið að gefa út aðra dagatalsbók fyrir 2009 og leitar nú að konum sem vilja vera með í henni. Viðbrögðin hafa ekki staðið á sér og enn má bæta við áður en fresturinn rennur út. Salka auglýsir eftir einni til tveimur setningum frá konum á öllum aldri, með mismunandi reynslu, starf og lífsstíl. Þetta þurfa ekki að vera langar eða heimspekilegar hugleiðingar heldur eru það hugrenningabrot og stemmning sem við sækjumst eftir. Ykkur er algerlega í sjálfsvald sett hvað þið skrifið um; svo lengi sem það er frá eigin brjósti. Þið getið skrifað um hvað sem er ... hvort sem það er um pípulagnir, skýjafar, stjórnmál eða tilfinningar: Þið eigið orðið.

Við förum yfir allar innsendar hugleiðingar og veljum þær sem okkur finnst henta best í bókina. Eftir að hafa valið 64 hugleiðingar (í byrjun hverrar viku og mánaðar)látum við viðkomandi vita og sendum hugleiðinguna með þeirri mynd sem hönnuðurinn - Myrra Leifsdóttir - velur henni.
Hugleiðingum er skilað á [e-mail] og ef þú vilt kynna þér verkefnið frekar þá kíktu á heimasíðu dagbókarinnar: www.konureigaordid.is.

                                                                                                                                                                                                                                                                                                           

 

                    

Afleggjarinn kvikmyndaður

Framleiðslufyrirtækið WhiteRiver Productions, í eigu Elfars Aðalsteinssonar og Önnu Maríu Pitt, hefur keypt kvikmyndaréttinn að skáldsögunni Afleggjarinn eftir Auði A. Ólafsdóttur sem á dögunum fékk bæði Menningarverðlaun DV í bókmenntum 2008 og Bókmenntaverðlaun kvenna, Fjöruverðlaunin, fyrir bókina.

Höfundurinn gerði einnig samning um að koma að handritsgerð kvikmyndarinnar og er sú vinna þegar hafin. Ráðgert er að handritsvinnu ljúki í haust.

Verkefnið er viðamikið og munu bæði íslenskir og erlendir aðilar koma að gerð myndarinnar. Leikarahópurinn mun einnig verða alþjóðleg blanda, en höfuðpersóna bókarinnar er kornungur faðir sem eignast ,,guðdómlegt" stúlkubarn með vinkonu vinar síns. Þegar barnið er nokkurra mánaða tekst hann á hendur ævintýralega ferð til að rækta rósir í fjarlægum klausturgarði. Á hinum framandi stað stendur söguhetjan andspænis áleitnum spurningum um tilvist mannsins, líkama og dauða. Aðrar helstu persónur bókarinnar eru kaþólskur prestur sem talar 34 tungumál, stúlkubarnið guðdómlega sem á sér tvífara í gamalli altaristöflu í þorpinu, að ógleymdri móðurinni sem er að læra mannerfðafræði en langar að gera ýmislegt áður en hún tekst á við móðurhlutverkið.

Áætlað er að tökur á Afleggjaranum muni hefjast í lok næsta árs og fara fram bæði á Íslandi og í suður Evrópu þar sem bókin gerist að stórum hluta til í litlu þorpi á fjarlægum stað.

Rósir, kynlíf og dauðinn

Ástin liggur í loftinu

og bók Þórarins Hjartarsonar um ástarljóð Páls Ólafssonar Eg skal kveða um eina þig er komin í fyrsta sæti metsölulistans í flokki skáldverka. Bókin rennur út og er upplagið óðum að klárast. Páll lifði ævidaga sína nær því á enda án þess að út kæmi eftir hann ljóðabók en það kom ekki í veg fyrir að menn kynnu fleiri ljóð og vísur eftir hann en nokkurt annað skáld. Hann á greinilega enn sinn stað í hjörtum þjóðarinnar þó hann hafi ekki fengið sess opinbers þjóðskálds, því þjóðin lærði og kann enn fjölmörg ljóð hans sem fljúga léttum vængjum um landið. 

Mikilvægur hluti bókaútgáfu

Meira mætti vissulega vera gefið út af hljóðbókum á Íslandi og er það eitthvað sem betur mætti fara hjá íslenskum forlögum. Hljóðbækur þjóna ekki eingöngu blindum eða sjónskertum heldur hefur lesblint fólk löngum notið góðs af þeim og auk þess er alltaf gaman að hlusta á upplestur góðra bóka við leik og störf. Við hjá Sölku höfum ekki látið okkar eftir liggja í hljóðbóka útgáfu og eigum ýmislega titla á lager. 

Hér er listi yfir titlana sem í boði eru:

Þjóðsögur Jóns Árnasonar
Emil í Kattholti
Ævintýri H.C. Andersen 1
Ævintýri H.C. Andersen 2
Kátir voru karlar
Æðrulaus mættu þau örlögum
Lífskraftur á landi og sjó
Ótuktin cd Postulín cd
Sögur fyrir svefninn 1 cd
Sögur fyrir svefninn 2 cd Fyrst ég gat hætt cd Blöndukúturinn cd Borgfirsk blanda eftirminnilegir atburðir cd Borgfirsk blanda kynlegir kvistir cd

Hljóðbókamarkaðurinn stækkar

Prjónablogg

Hélene Magnússon, - sú hin sama og færði okkur leyndarmál franskrar salatsósu og kenndi okkur að prjóna rósaleppaprjón í nýmóðins stíl, var að opna prjónablogg; www.helenemagnusson.blogspot.com. Prjónablogg eru orðin vinsæll viðkomustaður prjónaáhugafólks - sem er alltaf að fjölga, til að fá hugmyndir og einnig til að sjá hvað aðrir prjónarar eru að bardúsa.
 

Riddarar söngsins

gerðu stormandi lukku síðastliðið laugardagskvöld á Café Flórunni. Færri komust að en vildu á þennan einstaka viðburð sem tónleikarnir voru. Þau, sem kalla sig Riddara söngsins, eru: Þórarinn Hjartarson og Ösp Kristjánsdóttir syngja, Kristinn H. Árnason spilar á gítar, Birgir Bragason á kontrabassa og Hjörleifur Valsson leikur ótrúlegar kúnstir á fiðluna. Þórarinn rakti ástarsögu Páls og Ragnhildar og inn á milli sungu þau og Árni Hjartarson las nokkur áhrifamikil ljóð. Þau fengu þvílíkar undirtektir að þakið ætlaði af húsinu og allar bækurnar seldust upp og kalla þurfti til fleiri bækur til metta fjöldan - hungraðan í ljóð Páls Ólafssonar.

Myndir af atburðinum eru í albúmi á kantinum hér til vinstri og þar er hægt að sjá gleðina og hæfileikana sem fóru saman þetta sumarkvöld í júní. 

Eg skal kveða um eina þig alla mína daga

Mín kvæði eru minn innri maður en engin uppgerðarpóesí,“ skrifaði Páll Ólafsson um kveðskap sinn, en í vikunni kemur út hjá Sölku bókin; Eg skal kveða um eina þig, alla mína daga, ástarljóð Páls Ólafssonar. Bókin kemur út bæði í harðbandi og sem kilja. Hún er 352 blaðsíður og prentuð hjá Odda ehf. Sigrún Sigvaldadóttir hannaði útlit bókarinnar.

Eftir Pál liggur eitt mesta safn ástarljóða nokkurs íslensks skálds og núna er þessum arfi í fyrsta sinn safnað í eina bók og birtur fjöldi kvæða og vísna sem ekki hafa áður sést á prenti. Ástarljóðin eru fyrst og síðast skáldleg tilfinningatjáning en í tímaröð mynda þau jafnframt ástarsögu þeirra Páls og Ragnhildar Björnsdóttur.
 
Þórarinn Hjartarson tók efnið saman of skrifarskýringartexta. Hann hefur áður fengist við Pál Ólafsson og sýnt fram á að fá skáld, ef nokkur, eru söngrænni en Páll og hann á sinn stað í hjarta þessarar þjóðar. Það sýnir Þórarinn í verki því hann er ennfremur einn fimmti af hópnum Riddarar söngsins sem kemur saman endrum og eins til að hylla Pál Ólafsson.

Riddarar söngsins munu troða upp í versluninni Tólf tónum á Skólavörðustíg föstudaginn 13. júní kl. 17.00 og í Café Flóru í Grasagarðinum í Laugardal laugardagskvöldið 14. júní kl. 21 í tilefni af útgáfu bókarinnar. Hópurinn er svo skipaður: Þórarinn Hjartarson og Ösp Kristjánsdóttir syngja, Hjörleifur Valsson leikur á fiðlu, Kristinn H. Árnason á gítar og Birgir Bragason á kontrabassa. Allir eru velkomnir meðan húsrúm leyfir.