Japanskar konur hraustar og grannar

Út er komin bókin Japanskar konur hraustar og grannar hjá bókaforlaginu Sölku. Í bókinni, sem er eftir Naomi Moriyama og William Doyle, fjalla höfundar um af hverju fólkið í Japan lifi lengur en annars staðar í veröldinni og af hverju konurnar þar séu grennri og unglegri. Þau segja það ekki bara japönskum erfðaeiginleikum að þakka heldur líka mataræðinu og telja það sannað að Vesturlandabúar sem tileinka sér japanskt mataræði verði hraustari og grennri.   Í bókinni segir Naomi frá matarmenningu þjóðar sinnar og hvernig þau hjónin aðlöguðu japanskt mataræði vestrænum lifnaðarháttum sínum. Bókin er auk þess sneisafull af girnilegum, meinhollum og einföldum uppskriftum og fróðleiksmolum um japanskt hráefni og matargerð.   Naomi Moriyama ólst upp í Tókýó en flutti til Bandaríkjanna þar sem hún fór í háskólanám og bætti á sig 12 kílóum! Nokkrum árum síðar fór hún með amerískum eiginmanni sínum til Tókýó og dvaldi þar í mánuð. Fyrr en varði hrundu kílóin af þeim báðum án þess að þau gerðu nokkuð til þess. Bókin er í kiljubroti, 273 blaðsíður, og  prentuð í Finnlandi. Eyjólfur Jónsson sá um umbrot og Salka og GBÓ hönnuðu kápuna. 

Þýðandinn, Þóra Sigurðardóttir, er einnig höfundur bókanna; Djöflatertan og Ef þú bara vissir í samstarfi við Mörtu Maríu Jónsdóttur. Hún býr á Bahamas með eiginmanni sínum Völundi Snæ Völundarsyni sem rekur þar tvo veitingastaði. 

Uppáhaldsbók Nínu

Gaman var að sjá í Mogganum í dag að uppáhaldsbók Nínu Daggar Filipusdóttur - stórleikkonu, sé Rigning í nóvember eftir Auði A. Ólafsdóttur. Rigning í nóvember kom út hjá Sölku 2004 og hlaut frábærar viðtökur.

Borgarbókasafn í Grófinni á Menningarnótt

kl. 18:30

Auður Ólafsdóttir rithöfundur les úr verðlaunabók sinni Afleggjarinn, en þar segir frá ferðum ungs manns á framandi slóðir, í fleiri en einum skilningi. Ófyrirsjáanlegir atburðir taka völdin og söguhetjan þarf að glíma við karlmennsku sína, líkama, ást, matargerð og rósarækt.

Blálandsdrottningunni fagnað

Útgáfu Blálandsdrottningarinnar var fagnað í blíðskaparveðri á Eyrarbakka, hinum gamla kartöflubæ, sunnudaginn 10 ágúst að viðstöddum góðum gestum. Gestgjafi var Lýður Pálsson safnstjóri í Húsinu sem bauð gesti velkomna og höfundurinn, Hildur Hákonardóttir, sem rakti tilurð bókarinnar og rifjaði upp atriði úr sögu ræktunarinnar á staðnum, Magnús Karel skýrði loks frá hvernig hún mótaði ásýnd þorpsins á sinni tíð. Á eftir voru bornar fram léttar veitingar í boði Sölku, Hússins og kartöflubænda úr Þykkvabæ.

Í bókinni er m.a. rætt við þau Guðleifu Friðriksdóttur, Einar Guðmundsson og Guðmund Sæmundsson sem öll þekktu þá sögu þegar Eyrarbakki var einn merkasti kartöfluræktunarstaður landsins. „Hugmyndin kviknaði þegar ég starfaði sem byggðarsafnsforstjóri í safninu sem þá var á Selfossi,“ rifjar Hildur upp. „Meðal þess sem ég fjallaði um þá voru verðlaun dönsku stjórnarinnar sem veitt voru þeim sem helst sköruðu fram úr í bátasmíðum, túnasléttum og jarðrækt. Þá rann upp fyrir mér að þau pössuðu alls ekki við þá söguímynd sem ég hafði af einberri kúgun. Það sat alltaf í mér.“Það var fyrir átta árum að Hildur byrjaði á vinnslu bókarinnar en í millitíðinni sendi hún frá sér tvær aðrar bækur, Ætigarðinn og Já, ég þori, get og vil. „Það skeði eiginlega óvart að ég gaf út þessar bækur,“ segir Hildur en kveðst í upphafi hafa skynjað að saga kartöflunnar á Íslandi væri á margan hátt sérstök. „Kartöflur komu fyrst hingað til lands fyrir 250 árum en þróunin varð með nokkuð öðrum formerkjum og erlendis. Hér studdi hún ekki við borgarmyndun og því iðnbyltingin var ekki komin á það stig heldur þorpamyndun því hún gaf þurrabúðarfólki í sjávarplássum tækifæri á að komast af. Bókarnafnið er tilvísun á fyrstu konuna, Viktoríu Lever, sem ræktaði kartöflur í atvinnuskyni á Akureyri auk þess að vera nafn á fágætri tegund.

Japanskar konur - hraustar og grannar

Þessi frétt kemur okkur hjá Sölku ekkert á óvart því bókin Japanskar konur hraustar og grannar sem kemur bráðum út hjá Sölku, fjallar akkúrat um það hvernig japanskt mataræði og lífstíll halda konum ungum og hraustum. Mataræði sem samanstendur af smáum skömmtum af grænmeti, fiskmeti og hrísgrjónum getur ekki verið annað en heilsusamlegt og gott fyrir andann.

 Hægt er að nálgast meiri upplýsingar um bókina á slóðinni www.japanesewomendontgetoldorfat.com

Japanskar konur langlífastar

Blálandsdrottningin og fólkið sem ræktaði kartöflurnar

 

Út er komin bókin Blálandsdrottningin og fólkið sem ræktaði kartöflurnarhjá Sölku. Í bókinni er rakin saga ræktunar á Íslandi, og reyndar víða um heim, með sérstakri áherslu á upphaf kartöfluræktar. Höfundurinn, Hildur Hákonardóttir, hefur ferðast allt frá Suður – Ameríku til Eyrarbakka og kynnt sér hvernig fólk þróaði ræktunaraðferðir. Hún fjallar um mismunandi tegundir og hverjar duga best í mismunandi umhverfi. Með einstökum frumleika og sköpunargleði tengir hún kartöfluræktun íslenskri menningarsögu og fjallar um merka menn og konur sem lögðu hönd á plóg í beinni og óbeinni merkingu. Þar má nefna Baldvin Einarsson, Vilhelmínu Lever, Eggert Ólafsson og Elísabetu Englandsdrottningu.

 

Blálandsdrottningin hefur líklega borist hingað með frönskum skútum. Hún er ein af mörgum afbrigðum hinnar auðmjúku kartöflu sem hefur verið í öndvegi á borðum Íslendinga alla tuttugustu öldina. Nafn bókarinnar vísar þó einnig til hinnar hugrökku og hjartastóru söguhetju sem varð fyrst kvenna á Íslandi til að hafa tekjur af kartöflurækt.Bókin kemur út sem sem kilja og er 272 blaðsíður. Hún er prentuð í Lettlandi og Margrét E. Laxness gerði kápu, Oddi sá um umbrot en Hildur Hákonardóttir hannaði útlit bókarinnar. Helgi Magnússon hafði umsjón með texta.

 

Hildur Hákonardóttir sem einnig er höfundur hinnar sívinsælu bókar Ætigarðurinn – handbók grasnytjungs er þekkt fyrir líflega og grípandi frásagnargleði. Bókin skartar fjölda litmynda ásamt ítarlegum upplýsingum um heimildir.

 

Bókin kemur út í tilefni 250 ára afmælis kartöfluræktar á Íslandi og ennfremur er 2008 ár kartöflunnar hjá Sameinuðu þjóðunum. Hildur mun halda fyrirlestur, um karöflurækt á Íslandi, í Grasagarðinum í Laugardal, fimmtudaginn 14 ágúst kl. 20:00. Allir velkomnir.

 

Rósaleppar eru verðugt viðfangsefni

 

Þekkta prjóna-netblaðið: Knitter´s review gaf Rósaleppa-prjónabókinni hennar Héléne Magnússon góða dóma. Í greininni segir Lela Nargi frá rósaleppa-prjóni og hvernig konur prjónuðu mynstur inní roðskinnsskónna sína og vönduðu sig mjög þó svo fáir sem engir myndu nokkurn tímann sjá það - því jú, það var hulið undir iljum fólksins. Hún minnist einnig á að þess konar prjón hafi í raun ekki haft neinn tilgang í nútímanum og var að leggjast í gleymsku, þangað til Héléne enduruppgötvaði og endurnýjaði mynstrið. Hún hefur hannað ótal flíkur, frá peysum að vettlingum og þannig dustað rykið af þessum ótrúlega fallegu mynstrum.

Lela segir uppskriftirnar vera flóknar, fallegar og hugrakkar og séu ögrandi verkefni fyrir prjónara sem sé tilbúin til að prufa eitthvað nýtt og töfrandi.  

Hægt er að kaupa nýja uppskrift eftir Hélene eingöngu á http://www.lelanarginews.blogspot.com/

Valhopp

Barnabókin Gallop, sem er búin að slá svo aldeilis í gegn (er að klára sína 34 viku á metsölulista N.Y. Times), kemur út hjá Sölku í haust. Höfundur bókarinnar, Rufus Butler Seder, fann upp sérstaka tækni sem hann kallar scanimation og minnir á töfrasjónauka sem margir léku með í æsku, og han notaði við gerð bókarinnar. Allar bækurnar eru handgerðar og fór Rufus sérstaklega til Kína til að kenna handverksmönnunum að búa til bækurnar. 

Höfundurinn er uppfinningamaður, listamaður, og kvikmyndagerðamaður sem hefur djúpstæðan áhuga á antik- sjónbrenglunar-leikföngum. Hann fann einnig upp Lifetiles/lífflísar, veggmyndir gerðar úr glerflísum sem virðast lifna við þegar áhorfandi gengur fram hjá þeim; þær eru til sýnis á Smithsonian safninu í Bandaríkjunum

Hver einasta blaðsíða í Valhoppi er undur útaf fyrir sig og þar koma m.a. til sögunnar valhoppandi hestur og skjaldbaka sem syndir upp blaðsíðuna, hundur sem hleypur, köttur sem stekkur og fiðrlildi blakar vængjum.

 

Eigum við orð?

Vegna þess hve dagatalsbókin Konur eiga orðið 2008 fékk frábærar viðtökur hefur bókaútgáfan Salka ákveðið að gefa út aðra dagatalsbók fyrir 2009 og leitar nú að konum sem vilja vera með í henni. Viðbrögðin hafa ekki staðið á sér og enn má bæta við áður en fresturinn rennur út. Salka auglýsir eftir einni til tveimur setningum frá konum á öllum aldri, með mismunandi reynslu, starf og lífsstíl. Þetta þurfa ekki að vera langar eða heimspekilegar hugleiðingar heldur eru það hugrenningabrot og stemmning sem við sækjumst eftir. Ykkur er algerlega í sjálfsvald sett hvað þið skrifið um; svo lengi sem það er frá eigin brjósti. Þið getið skrifað um hvað sem er ... hvort sem það er um pípulagnir, skýjafar, stjórnmál eða tilfinningar: Þið eigið orðið.

Við förum yfir allar innsendar hugleiðingar og veljum þær sem okkur finnst henta best í bókina. Eftir að hafa valið 64 hugleiðingar (í byrjun hverrar viku og mánaðar)látum við viðkomandi vita og sendum hugleiðinguna með þeirri mynd sem hönnuðurinn - Myrra Leifsdóttir - velur henni.
Hugleiðingum er skilað á [e-mail] og ef þú vilt kynna þér verkefnið frekar þá kíktu á heimasíðu dagbókarinnar: www.konureigaordid.is.

                                                                                                                                                                                                                                                                                                           

 

                    

Afleggjarinn kvikmyndaður

Framleiðslufyrirtækið WhiteRiver Productions, í eigu Elfars Aðalsteinssonar og Önnu Maríu Pitt, hefur keypt kvikmyndaréttinn að skáldsögunni Afleggjarinn eftir Auði A. Ólafsdóttur sem á dögunum fékk bæði Menningarverðlaun DV í bókmenntum 2008 og Bókmenntaverðlaun kvenna, Fjöruverðlaunin, fyrir bókina.

Höfundurinn gerði einnig samning um að koma að handritsgerð kvikmyndarinnar og er sú vinna þegar hafin. Ráðgert er að handritsvinnu ljúki í haust.

Verkefnið er viðamikið og munu bæði íslenskir og erlendir aðilar koma að gerð myndarinnar. Leikarahópurinn mun einnig verða alþjóðleg blanda, en höfuðpersóna bókarinnar er kornungur faðir sem eignast ,,guðdómlegt" stúlkubarn með vinkonu vinar síns. Þegar barnið er nokkurra mánaða tekst hann á hendur ævintýralega ferð til að rækta rósir í fjarlægum klausturgarði. Á hinum framandi stað stendur söguhetjan andspænis áleitnum spurningum um tilvist mannsins, líkama og dauða. Aðrar helstu persónur bókarinnar eru kaþólskur prestur sem talar 34 tungumál, stúlkubarnið guðdómlega sem á sér tvífara í gamalli altaristöflu í þorpinu, að ógleymdri móðurinni sem er að læra mannerfðafræði en langar að gera ýmislegt áður en hún tekst á við móðurhlutverkið.

Áætlað er að tökur á Afleggjaranum muni hefjast í lok næsta árs og fara fram bæði á Íslandi og í suður Evrópu þar sem bókin gerist að stórum hluta til í litlu þorpi á fjarlægum stað.

Rósir, kynlíf og dauðinn